السلام عليكم ورحمه الله وبركاته
الحمد لله مصر من الدول اللى اتوقع انها بتنهار خلاص
وقريبا هتنضم مصر للتاريخ القديم ويدرسها الاجيال القادمه وهيستغلسوا الجزء بتاع اسباب سقوط جمهورية مصر العربية لانه هيبقى مليان وكله حفظ وصم
ده اصلا لو اهتم حد بدراسه تاريخ مصر الحديث يعنى
او اقولكم بلا هتسقط خلينى متفائله
مصر هتبقى فى يوم من الايام زى الهند كده دوله فيها كثافه سكانيه وفقر شديد
والاسباب على قفا من يشيل
انعدام ضمير
عدم شعور بالمسئوليه من اصغر مسئول لأكبر مسئول - اللى هو مش مسئول ولا حاجه اصلا-
طبعا الا من رحم ربى مش هجمع
انما يعمل ايه الناس اللى لسه ضميرهم صاحى وبيراعوا ربنا فى كل حاجه قصاد اضعاف اضعاف أعدادهم
والحمد لله الشعب فى حاله
مؤمنين بسياسه " انا عايز اربى عيالى "
عايزين يربوا عيالهم فى مجتمع يحكمه انعدام الضمير
عايزين يربوا عيالهم على الخوف والمشى جنب الحيط
فعيش حياتك جنب الحيط
او اقولك خليك جوه الحيط احسن
او وقفوها فى الشمس تستقبل واحد من المسئولين وتجيلها ضربه شمس زى ما حصل فعلا
وراحت البنت وفداك يا معالى الوزير
فى غيرها
ولو وقّفنا لكل مسئول كام طفل كده هنساعد فى حل كثافه الفصول
بتعجبنى الحلول الخزعبلايه دى
مش بقولكم متميزين
وبعدين متضايقين ليه
احنا ما شاء الله كتير هتفرق معانا يعنى
مصر ولادّه يا ناااااااس
هنجيب زيهم واكتر منهم لا تقلقوا
.
التعليم بينحدر
والصحه بتنحدر
والاعلام انحدر وشعاره " خلى الدماغ فاضى على راى واحده صاحبتى "
والثقافه بتنحدر
والمواصلات بتنحدر
والاخلاق بتنحدر
......
....
..
الامل معدوم معدوم يا ولدى
وقولوا على مصر السلام
عايزة اختم بالايه الكريمه
بسم الله الرحمن الرحيم
له معقبات من بين يديه ومن خلفه يحفظونه من أمر الله إن الله لا يغير ما بقوم حتى يغيروا ما بأنفسهم وإذا أراد الله بقوم سوءا فلا مرد له وما لهم من دونه من وال [الرعد : 11
لعل وعسى نعمل بيها ويتجدد الامل تانى
سلام عليكم
18 comments:
أولاً اقرأي ده
May 30, 2007 at 1:38 AMhttp://msh-ana.blogspot.com/2007/05/blog-post_07.html
أنا مش متفائل أوي لأن الوضع الحالي لا يدفع إلى ذرة واحدة من التفاؤل بس ده مش يخليني أيأس
ده يخليني أحس إن مسئوليتني ناحية البلد دي أكبر
و ده مش كلام نظري بس
لا تطبيق عملياعلي صوتي بالاصلاح و اتقي ربنا في شغلي و لما اتجوز ان شاء الله أبني بيت مسلم يتقي الله
لماذا ضاع بني اسرائيل في التيه 40 عاما .. حتى يأتي جيل جديد
لانريد أن نكون مثلهم
بل ندعو دائما
اللهم استعملنا و لا تستبدلنا
لا تجعلي اليأس يدخل الى قلبك و قولي زي ما باقول
" و لان البلد دي مش زي ما انا عاوزها تكون .. هافضل وراهم لحد ماتبقى مصر اللي أنا باحبها مش اللي هم عاوزنها"
بارك الله فيكي
قرأت البوست ..
May 30, 2007 at 2:52 AMالوضع لا يعطى امل ابدا
وانا لسه بدى لنفسى الامل برضو بالايه الكريمه اللى ذكرتها فى الموضوع ان هيجى اليوم والناس هتفوق والحال هيتغير
بس هل هلحق اشوف اليوم ده
الله اعلم
جزاك الله خيرا على ردك يا اخ علاء:)
اولا انا اتشرفت جدا باطلاعي على مدونتك يا امنيه واتمني تشرفيني في مدونتي ..ثانيا انا قريت المدونه كلها اللي انتي بخيله فيها اوي وعاجباني كتاباتك جدا ومع اني مختلف معاكي في كذا حاجه.. واحد صاحبي سالته هو احنا بنرجع لورا ليه ؟ قالي مين قالك اننا بنرجع لورا .. احنا مبقاش في ورا نرجع فيه احنا اخر الورا خلاص !!!!؟ انا معاكي جدا ان احنا عندنا مشاكل كتييير جدا في مجالات كتير اوي لكن ده مش معناه اننا بنضيع او بننهار على قولك .. مش للدرجه دي وذي ما في ناس ........ كمان في ناس اكتر بتحاول تصلحها.. ناس بتحبها وبتنفعل عشانها وبتضايق لسيئاتها وبتزعقلها وتزعل منها لما تغلط وتشتمها لما تظلم وتكشر في وشها.. لكن لما تنده محتاجالهم هم اول اللي بيقفو في ضهرها .. صح؟؟!!
May 30, 2007 at 3:41 AMجزاكم الله خيراً
May 30, 2007 at 4:14 PMو إن كنت علقت على القصة ف حارة زعتر
بس موضوع إمشى جوه الحيطه ده خلاص مابأش ينفع
مابأش فيه حيطة أصلاً
الأسمنت بقى تمنه الضعف
و ربنا يخلينا أخمد عز
طن الحديد وصل 4000 جنيه
تحياتى
ربنا يفتح نفسك دنيا وأخره
May 31, 2007 at 2:29 PMcrazyboy:
May 31, 2007 at 4:07 PMجزاك الله خيرا على كلام حضرتك
لسه فى امل لو عملنا بالايه المذكورة
:)
________
الاخ جمعاوى روش طحن :
هو الحديد بس اللى غلى :((
________
كليوباترا :
بجد تعليقك ضحكنى اوى:D
هو انا سودتها اوى؟؟
مش لازم نبره اليأس دي
May 31, 2007 at 9:19 PMالصوره قاتمه ولكن والله الفرج قريب
واحنا اللي نغير الوضع ده
تفائلوا خيرا تجدوه
May 31, 2007 at 9:52 PMعلى الرغم انه ليس هناك مايدعوا للتفاؤل
لكن بردو متفائله الى حد ما
الامل هو اليأس من اليأس:)
June 1, 2007 at 2:14 AMفى امل بس محتاج مجهود مش هنوصله واحنا الا لما نعرف دينا كويس:)
موضوعاتك جميله زيك يا امنيه
June 2, 2007 at 12:47 AMان شاء الله امل مصر فيكى وفى الى زيك يا امنيه بجد
ربنا يكرمك
أهلا يا أخت أمنية :)
June 2, 2007 at 11:47 AMإيه يا ستي بس ليه كدة؟..مفيش داعي لكل ده..طالما عقلك في راسك..
أكيد هتعرفي خلاصك :D
بس ادعي ربنا يثبت العقل احسن شكله هيروح منا عاللي بيحصل ده :D
سمية :
June 2, 2007 at 3:37 PMنورتى المدونه
:)
ربنا يكرمك
___________
اخ يحيي :
انا حاسه من كلامكم انى مسوداها اوى:D
بس اصلى كنت بتكلم فى الموضوع ده مع ناس واتشحنت بصراحه بالاضافه لحادث البنت اللى توفت
وبعدين هى رمادى تميل للسواد يعنى
ده الواقع
بفكر ارحم دماغى
:D
يا جمالك يا امنيه ... هى هى امنيه الى انا عارفاها
June 3, 2007 at 9:24 PMانا وامنيه كنا ماشيين مع عض فى الجامعه انهاردة ... فلاقينا واحد بيبثق ... فراحت امنيه تقولى بدل ما فى ناس بالشكل ده لسه فى البلد يبقى البلد مش هتنضف
قلتلها يبقى عمرها ما هتنضف ... ربنا يكون فى عونا يا مصريين
انتى بتستهونى!!
June 3, 2007 at 10:42 PMاولا منظر مقزز
ثانيا موقف حصل قدام والدى فى اسكتلندا
تربيه الكلاب عندهم منتشره وبياخدوا الكلاب يفسحوهم ..المهم بابا كان ماشى فى الشارع وعلى الصف التانى واحد بيفسح الكلب بتاعه
الكلب لبى نداء الطبيعه فى الشارع على الرصيف
فما كان من صاحبه الا ان اخرج منديلا او ورقه ونظف المكان والقى بالورقه فى صندوق القمامة
تفهموا ايه من ده!!
يااارب
اولا احييكي
June 4, 2007 at 12:07 PMعلى المدونة اللطيفة
وعلى شعورك وحسك الوطني
بس
عايز اقولك
تفائلي
بس مش مطوعاني
مونى حبيبتى اخيرا اتحلت المشكله وقدرت اعتمد رد اصل كان فى مشكله عندى
June 15, 2007 at 11:01 PMالمهم
مدونتك بصراحه ماشاء الله جميله جدا
وعجبنى الموضوع ده اوى
والل هيا بنتى كل كلمه قلتيها صح
انا فعلا كل يوم اسال نفسى
احنا هنوصل لفين بعد كده
بكده كل شئ من حوالايا عمال ينهار واقول يمكن بكره فى امل
لكن مفيش فايده فعلا
اتمنى بجد الحال يتغير
لنااااااااااااااا الله
اكتب بالرصاص:
June 16, 2007 at 7:49 AMاضحكتنى كلماتك
هم يبكى وهم يضحك والله
الله المستعان
اسماء:
الحمدلله انها اتحلت
منورة
على رأيك
هنوصل لفين؟؟
ربنا يستر
برضو انا مصره ان الامل موجود لو نفذنا الآيه الكريمه اللى ذكرتها
الأمل هو اليأس من اليأس
Post a Comment