أستودعكم الله


السلام عليكم ورحمه الله وبركاته

ولله الحمد ..

اختارنى الله لأن اكون من ضيوفه هذا العام

غداً بإذن الله أسافر إلى السعودية

سأشتاق إلى المدونه ولكن شوقى للبيت الحرام يجعل فراقها يسيراً جداً

اللهم اكتبها لكل مشتاق

وأطلب منكم الدعاء لتيسير الإمتحانات..
blush.gif

أستودعكم الله دينكم وأماناتكم وخواتيم أعمالكم

السلام عليكم ورحمه الله وبركاته

الفرانكو-آراب

salam 3licom wa rahma allah
hatkalem enharda 3an mawdo3 benarvzny
wa how alzahera beta3et alfranko arab!!

حقيقى بحس انى طفله لسه بتتعلم القراءه
بحس انى بقرأ حرف حرف
وبفتكر دايما مشهد مسرحيه لمارى منيب بتقول " انتى جايه إشتغلى ايه ؟؟


انا بجد نفسى اعرف تفسير لاستخدام الحروف الانجليزى فى الكلام باللغه العربيه
طبعا مش بتكلم عن الناس اللى جهازهم مش بيكتب عربى ومضطرين لاستخدام الحروف الانجليزى
انما اللى بينرفزنى الناس اللى عندها عربى وبرضو بتتكلم كده!
ولما اطلب انها تكتب بحروف عربى لسهولة القراءه يكون الرد
asli met3aweda akteb english
!!
طب اتعودتى ازاى؟
اكيد متولدتيش بتكتبى انجليزي بسرعه!



هل هو نوع من الفزلكه؟
ولا نوع من الكسوف من الحروف العربى؟؟
ولا ايه بالظبط
روشنه يعنى؟
بجد عايزه اعرف تفسير الظاهره دي


عمرى ما شوفت واحد انجليزي بيكتب بحروف عربى ولا هندى ولا صيني
كل لغه ليها حروفها
هتتكلم عربى يبقى حروف عربى
هتتكلم انجليزي يبقى حروف انجليزي
لكن متعملش لغه ولا هى عربى ولا هي انجليزي!!!

!!


أيها المصرى..قد أخزيتنا





سلام عليكم ورحمه الله وبركاتة

فى حلقه من برنامج حواري سمعت ما صدمنى
احصائيه تقول

"علي الرغم من عدم وجود حصر دقيق لعدد المصريين العاملين في إسرائيل، إلا أن بعض التقديرات تشير إلي أن عددهم تجاوز 28 ألفاً. فمنذ 7 سنوات أعلنت الدكتورة أمينة الجندي وزيرة الشئون الاجتماعية ـ آنذاك ـ أن عدد المصريين في إسرائيل، وصل إلي 17 ألفاً، وبالتالي من المؤكد أن
الفترة اقترب من الضعف، ما بين عمالة شرعية وغير شرعية, والكارثه الاكبر ان.
"13 % من العماله المصريه فى اسرائيل يعملون فى الجيش الإسرائيلي



تعددت الاسباب والنتيجه واحده
مصريين هاجروا لـ(إسرائيل)
الاغلب تزوجوا من عرب 48 وقله تزوجت من يهوديات اسرائليات
وحوالى 13 شاب حصلوا على الجنسية الاسرائيلية
وتم انشاء رابطه لهم تحت اسم
" رابطة المصريين فى اسرائيل "

هل أنت كمواطن عربي تقبل تحت اى ظروف السفر لإسرائيل والعمل بها؟

يقول مسئول الرابطه ان هدفهم هو تحقيق النصروالنصر ليس بالحرب فقط
بل هو نصر عن طريق هدم الافكار التى تكونت عن المواطن المصري كإنسان متخلف !

هدفهم اثبات قدره المصرى على العمل والانتاج والتقدم والتفكير
واستطاعت الرابطه – على حد قول المسئول – انها تحقق جزء ضئيل من تلك الاهداف
علما بان لم يكن فى هدفهم حين سافروا تلك الاهداف!!

اوجه لك سؤال يا اخى المصري
هل الأولى ان تثبت نفسك فى بلدك وتحسن من نفسك لتصل بها الى مستوى يجعلها تقف فى وجه عدوك
ام ان الافضل ان تثبت نفسك لدى عدوك ليهابك!


هل تعلم يا اخى المصري انك بذلك تساهم فى الثروه الاقتصاديه فى اسرائيل!
جعلت من هدفك مكسباً لهم!!

وهل تعلم ان مهما اصبحت لن يرضو عنك الا عندما تتبعهم
هم لا يريدونك ان تتهود ,لا فهم يروا انفسهم شعب الله المختار وانت عربى حقير
هل تعلم ان تلك نظرتك لهم
مجرد اداه يمكن الاستعانه بها لأغراض اخرى


هل تعلم اخى المصري ان اولادك قد يحصلوا على الجنسية الاسرائيليه فى يوم من الايام وينخرطوا جبرا فى صفوف الجيش الاسرائيلي!!
بماذا تشعر وانت تعيش وسط من يسعد بمقتل اخوانك؟؟
ام اصبحوا هم اخوانك الآن!!
هل خطر فى بالك يوما ان تصبح فجأه اسيراً لدى إسرائيل؟؟


اخى المصري
تقول ان وطنيتك لم تهتز بعيشك فى اسرائيل
فلنسلم بذلك..فنحن لم ننس انك قد تربيت فى مصر ,ولكن ماذا عن أولادك
كيف لهم ان يكرهوا بلدا عاشوا فيها وتنفسوا من هواءها واختلطوا مع أهلها!!
بيدك تدمر روح العربى المسلم فى ابنائك
فى اى صف سيحاربون؟
وبأى وطن يؤمنون؟


عذرا
أيها المصري..
فقد اخزيتنا...

تاج العيد

سلام عليكم ورحمه الله وبركاته

كل عام وانتم بخير
هو صحيح العيد خلص خلاص
بس مش مشكله نعيد تانى :D

جالى تاج من رضوى صاحبه مدونه خليك فى حالك

بسم الله نبدأ

لو قالولك اختار عصر من عصور مصر علشان تعيش فيه تختار أى ‏عصر و فى عهد أى حاكم .. واشمعنى؟


محمد علي

أول ‏أولويه فى حياتك عيلتك ولا شغلك ولا أصحابك؟

عائلتى


إيه أكتر ‏حاجه بتحبها في رمضان؟

صلاه التهجد واقبال الناس على الخير..


اوصف ليا ‏أجمل فطار ممكن تفطره

:فطار مع اصدقائى ويكون عمايل ايدينا

ويفضل يكون عك ونتدبس فيه ساعه الفطار




لو أنت ‏حاكم على مجموعه من الأفراد هتكون عادل؟؟ طب هتعمل إيه عشان تتأكد إنك حاكم ‏عادل؟

هرفض من البدايه انى احكم افراد

لانى اخاف من المسئوليه


اللى بيبوظ الحكام .. نفسهم؟ ولا الشعب؟ ‏ولا الحاشيه المقربه؟


ضعف ايمان

وشعب ساكت

{فَاسْتَخَفَّ قَوْمَهُ فَأَطَاعُوهُ إِنَّهُمْ كَانُوا قَوْماً فَاسِقِينَ }الزخرف54


مين ‏أكتر إعلامي مصري بتحترمه؟

عمرو اديب

منى الشاذلي

قريت ديوان عمر مصطفى صاحب بلوج تجربه " أسباب وجيهه للفرح" ‏عن دار ملامح و لا لسه ؟؟


لم اسمع عن الديوان..


لو ‏ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ‏ايه؟

نفسى ادير حضانه للاطفال

او مشروع تجارى صغير


ايه تانى بلد تتمنى تعيش فيها بعد ‏مصر؟

فلسطين

اوصف ليا ‏ترتيبات أجمل فرح ممكن تحضره

مش بحب احضر افراح الا فى حاله واحده

ان تكون العروسه او العريس شخصيه غاليه عليا

وساعتها ايا كانت الترتيبات هبقى طايره من الفرح

بتراعي ‏كلام الناس والقيل والقال؟ لو اه او لو لا قول لى ‏ليه؟

الاهم انى اراعى رضا الله

بعد كده كلام الناس مش دايما باخد به


صحيت من النوم ما لقيتش الموبايل ولا الكمبيوتر ولا ‏الكاميرا الديجيتال ولقيتنا ‏رجعنا لعصر الحمام الزاجل والحصنه هتكون سعيد؟

لا

السعاده ‏هى؟

انى احس ان الله راضى عنى

عندك أمل ‏؟؟ أسبابك

اكيد والحمد لله

بطبيعتى انسانه متفائله

وديننا بيأمرنا بالتفاؤل



لما تحب ‏تهرب من كل شئ بتروح فين؟

بروح انام او اتكلم مع حد

امتى ‏أول مره خدت فيها نفس طويل كده وقلت بينك وبين نفسك يااااه الظاهر انا فعلا ‏كبرت؟

لما بشوف حد كبير فى السن

بحس ان العمر بيجرى منى


لما ‏بتعمل عمل خيرى بيكون ايه هو دافعك الاول؟
انى ارضى الله عز وجل

بتشرب ‏سجاير؟ لو الاجابه اه ايه شعورك لو شفت ست بتشرب سجاير؟ وليه ‏؟


لا الحمد لله مش بشربها

وبزعل على اللى بيشربها

بتعرف ‏ايدك اليمين من الشمال ازاي؟

كنت زمان وانا طفله اعمل نفسى باكل فأعرف ان دى اليمين

لكن دلوقتى خلاص الحمد لله بعرفها لوحدى

شاطره صح؟؟



ايه اكتر ‏اله موسيقيه بتحبها ؟ ؟

يااااه

كنت اقعد على اى آله واعرف مبادىء التعامل معاها وانطلق

بيانو – كمان – اكورديون –اكسلفون – اورج

بس خلاص دلوقتى بطلت عزف


فى رأيك ليه الذوق والنخوه ‏اتعدموا؟


بسبب البعد عن الدين


ايه ‏الحاجه اللى لو حصلتلك تبقى سعيد قوى؟؟؟

انى ارضى عن نفسى وده لما احس ان الله عزوجل راضى عنى

وده يندرج تحته كل حاجه

تختار ‏يبقى عندك...أرض زراعيه ولا أجنس عربيات و لا كام عماره و لا فلوس فى ‏البنك؟؟؟؟

أرض زراعيه وفلوس


البحر و ‏لا النيل؟؟؟

مممم

البحر

مركب و ‏لا طياره؟؟


الاتنين صعببببب

بس لو لازم اختار يبقى طياره



مجنون و لا ‏عاقل؟؟

ده انا يعنى؟؟

كده وكده



تقرأ ‏كتاب و لا تتفرج عليه فيلم؟
دى متعه ودى متعه تانيه خالص

ممكن الكتب التاريخيه افضل انى اتفرج على فيلم وثائقى افضل

امرر التاج لمين؟


لكل اللى مروا


مصحف لمن لا مصحف له..

السلام عليكم ورحمه الله وبركاته

وتعاونوا على البر والتقوى

...

الصورة دى فيها شاب إفريقى بينسخ المصحف على الواح بإيديه نظرا للفقر الشديد

وفى مصر..كل بيت فى عدد من المصاحف اللى مش بتستخدم فجت فكره تجميعهم وده حصل فى جامعة عين شمس
, فريق يجمع مصاحف وبيودوها الصومال وجزر القمروغانا..
لأنه كان فى ناس منهم بيجووا يتعلموا عندنا ..وبيرجعوا بلدهم ينشروا فيها الاسلام
وهما هناك ماعندهمش مصاحف كافية ..بالاضافه الى اماكن تانيه كتير

نزل الموضوع فى البدايه بأسم انشروا الاسلام بالله عليكم فى حارة زعتر
والتفاصيل كاملة هتلاقوها فيه...
وبعد كده نزل موضوع تانى محتاجين فيه كمية من المصاحف عشان الشحنة تطلع ونزل
الموضوع بأسم الاصدار الجديد انشروا الاسلام بنبحث فيه عن مصاحف زياده وفعلا طلعت أول شحنه إلى غانا كانت عباره عن من 4000 - 5000 مصحف تقريبا
بس حسينا اننا ممكن نتوقف فى لحظه ...
لما كل واحد يجيب المصاحف اللى في بيته واللى عند اقاربه واصحابه ...
طب لما الاقارب والاهل والاصحاب جمعنا من عندهم مصاحف
طب ايه ؟؟ هنتوقف ؟؟ ماينفعش نتوقف
فى ناس فى اشد الحاجه للمصاحف ومش لاقياها وبالتالى قررنا اننا بنحث عن بدائل اخرى
يمكن من خلالها الحصول على مصاحف
وكان البديل ده هو انتم اهل التدوين ونزل موضوع جديد اسمه ال زعتر جميعا واخص المدونيين
اتفقنا نحن المدونيين اننا نعمل اللى انتم بتشوفوه وبتقرأوه دلوقتى
حملة لتجميع المصاحف من المدونيين قررنا نلجأ لكم
حضراتكم هتسألوا اهلكم واقاربكم واصحابكم
واى حد تعرفوه عن مصاحف زياده عندهم..وتجمعوها عندكم
طب احنا هنجمعهم ازاى منكم ؟؟
احنا فريق من 8 اشخاص ...4 بنات و4 شباب
بنتين من الاسكندريه وبنتين من القاهره .. وكذلك الشباب
لو مثلا حضرتك شاب من القاهره هتراسل احدى الاخوة اللى من القاهره
ولو بنت او من الاسكندريه نفس الوضع

الايميلات بالنسبه للمدونيين من شباب الاسكندريه
هتراسلوا الاخ الجمعاوى الاصيل على الايميل التالى
el7amla_alex_b@yahoo.com

وبنات الاسكندريه هيراسلوا
el7amla_alex_g@yahoo.com


اما بالنسبه لبنات القاهره هيراسلوا
el7amla_cairo_g@yahoo.com

وبالنسبة لشباب القاهرة هيراسلوا الاخ جانو ( محمد )على
el7amla_cairo_b@yahoo.com

جددوا النيه معنا واحتسبوا الاجر والثواب
شوف لما تجيب مصحف من عندك ويقرأ فيه غيرك
او تعلن فى مدونتك عن الموضوع ده
والحسنه بعشرة امثالها ...متخيل؟؟ متخيل لما تساعد فى نشر الاسلام؟؟

طلب اخير او رجاء...بلاش مثلا ولد يضيف ايمل من الايميلات الخاصه بالبنات
فهى اماااااانة ليست الا ...
جزيتم جميعا خيرا
......................

الموضوع نقلا عن مدونه خليك فى حالك
مع بعض التعديلات....


ده احنا هنكرمووووووووك

أهلا بكم على أرض مصر

ويدخل السائح ويبدأ البيزنس عليه

من أول ما يوصل المطار
ومن أول ما يولع لمبه فى حجرته فى الفندق
متميزين فى ابتكار اساليب لكسب المال من الاجانب

من أسبوع زرت الأهرامات مع قرايبى جم من المغرب
مصريين الجنسيه لكن اللهجه مغربية وأول مره يزوروا مصر
مهزله واحنا داخلين
وكله علشان خاطر الفلوس
لدرجه انهم قالولى خلاص ندفع زى السائحين لأن فعلا الراجل ضايقهم بكلامه
!!!
أولى أساليب الجذب للعوده لزياره مصر
انت سائح...يبقى هتدفع اكتر يا خبيبى


جربوا تركبوا تاكسى قدام منطقه الاهرامات او منطقه سياحية
الضعف على طول
عدى الشارع بس
هترجع للاسعار العاديه
ايه المنطق ده!!
احنا بلد للاسف بيتقال علينا حرامية
فعلا ما كل اللى شافه السائح هات ..هات..هات
هيقول ايه علينا يعنى
شعب كرم ؟

انت لسه شفت حاجه
اما خليناك تدفع اللى قدامك واللى وراك



ده غير الجماعه الشحاتين
بصراحه الجماعه قايمين بشغل جامد جامد يعنى..
تلاقى واحد منهم نده
يا عيال سيااااااااااح
ويفضلوا لازقين فيهم
i want to eat
i want to eat

ويفضلوا لازقين فيهم
ولا حياه لمن تنادى
زى ما يكون الراجل بينونو مش بيقولهم لا

قريبتى فى الكويت بتقولى انهم هناك واخدين فكره عن مصر انها كلها شحاتين
ما عندهم حق
ينزلوا يتمشوا ...شحاتين
يطلعوا من مطعم ...شحاتين
يطلعوا من مول...شحاتين
واحيانا الشحاتين بيقدموا خدمه شحات دلفرى
تلاقى الباب خبط وواحده على الباب
!!

وانت فى المطار راجع بلدك
هتلاقى صندوق تبرعات من أجل مصر
حط فيه واركب طيارتك...

هل ما يحدث مع السائح فى مصر يدعوه لزيارتها مره اخرى؟؟
ام ان مصر تكتفى بزياره واحده مع ضروره تجميع ما يمكن جمعه من السائح!!
وهل مصر تعلم ان السائح سيحكى عما رآه فى بلده وده هيخليه اما يجذب الناس لزياره مصر او ينفرهم!

هل هو بيزنس مصر ام بيزنس المصريين؟؟
تفرق...



السلام عليكم ورحمه الله وبركاته

رسائل بجد مستفزه جدا جدا فى الماسنجر

اكتر واحده نرفزتنى وضحكتنى اوى بصراحه وضايقتنى على حالنا
اللى باعتاهالى نيتها خير وحاسه برضو انها مرغمه على ارسالها والا هتتشل!!

لسه حالا واصلالى

"إلا الله محمد رسول الله لو مبعتهاش تتشل وإنت قاعد "

استغفر الله العظيم
بجد ده عذرا فى اللفظ وسيله مستفزة ومتخلفه فى النصح والتوجيه للثواب
يعنى ايه تتشل لو ما بعت لا اله الا الله !!
نيه اللى عاملاها خير ان الناس تاخد ثواب لكن مش كده
الدين مقالش ندعى على حد لو ما قالش الدعاء ده!
ولا الرسائل اللى تقولك لو بعتها ل25 هيحصل حاجه تفرحك...احنا غلبنا المنجمين .. - مع احترامى للمؤمنين بالطريقه دى -

يا جماعه مش اسلوب ده
انا عامله ايميلى مقبره للرسائل دى والايميلات اللى من نفس النوع ده
انا مبقتش ادخل صفحه الميل دى ابدا الا علشان امسح لما يوصلوا 150 ايميل
وكلهم على وتيره ابعتيها ل25 لإما ربنا هيخرب بيتك!
عمرى ما ببعت الرسايل دى
ويوم ما ابعت حاجه بيكون لأنى عايزة ثواب مش لأنى مجبره على ده والا هتشل ولا هتعمى!!

مينفعش كده

دعوة إما لجعل الايميل مقبره لتلك الرسائل المستفزة

او

حذف الوعيد والتهديد منها قبل ارسالها بنيه الثواب


من أجلهم...تبرعوا

يضحى بالبقاء معها من اجل ان تحيا


السلام عليكم ورحمه الله وبركاته

مــــــــات منهم 35 و ينتظر و يتمنى بعضهمالموت
و 7 حالات ولادة ملقين فى الشارع علىالاسفلت!
من أجل من يعيشون فى مخيم داخل المخّيم!
مــــــن أجــــــل من يعيشون فى العراء
مــــن أجـــــــــــل من لا ذنب لهم
مـن أجـــــــل من ينتظرون..
إمــــــــا الموت أو الحياة
من أجلهم

من أجل الفلسطينين العالقين فى معبر رفح

تبرعوا

بنك فيصل

رقم حساب

122051

حساب فلسطين

ثم الاتصال باتحاد الاطباء العرب في القاهرة

0227957357

0227961792

وطلب الاستاذ رافت سعد وابلاغه بمبلغ التبرع لكي يوجهه الى العالقين في رفح

فلننصرهم بالمال ان امتنعنا عن نصرتهم بالدم

لا تقولوا إنا لا نملك لهم سوى الدعاء
الله شاهد عليكم

!!منقوووووول

السلام عليكم ورحمه الله وبركاته
يا ترى ايه احساسكم لو عملتوا سيرش على جوجل ولقيت موضوع كنت ناشرة مالى المنتديات !
ومش مكتوب انه منقول ولم يذكر المصدر
؟
______________

اتعرضت للموقف ده من كام يوم كنت بعمل سيرش فى جوجل ولقيت موضوعى بتاع " يا اصحاب العقول " كنت بتكلم فيه عن الخرافات المنتشره سبق ونشرت الموضوع قبل نشره فى المدونه فى منتدى حارة زعتر
فدخلت اشوف مكتوب منقول ولا لأ لقيت فى الاخر
" تحياتى "
لم يذكر انه منقول ونسبه لنفسه
ساعتها حسيت بشعورين
الاول انى اتضايقت انه نسبه لنفسه
!وفعلا دورت على كلمه تسجيل علشان اسجل فى المنتدى واقوله واحط موضوعى واقوله ان النقل يقتضى الامانه
لكن جالى وقتها شعور تانى

قلت انا عامله الموضوع ليه؟؟
عامله لله
بالعكس يسعدنى انه يتنقل
- طبعا المفروض ان يكون الناقل امين ويقول انه منقول مش لازم المصدر حتى
الغايه لا تبرر دوما الوسيلة -
لكن قولت انا بقول وجهه نظرى فى حاجه لتصحيح فكره دخلت فى عقول الناس
يبقى انا عاملاه لله
اللى نقله ومقالش حسابه عند ربنا بقى
انا هتفرق معايا ايه بأسمى ولا بإسمه مادام الموضوع لله
فتراجعت عن الاشتراك فى المنتدى
وقلت اجدد النية
لانى حتى وان اشتركت ووضحت الامر فالموضوع صعب انه يُحكم فى عالم النت
انتوا ايه رأيكم؟
بتبصوا للموضوع من اى زاوية؟

واه تعليمااااااه


سلام عليكم ورحمه الله وبركاته


كنت منزله بوست عن موضوع وبعدين قلت أأجلة وانزل حاجه خفيفة


فى منتدى واحده صاحبتى كتبت تخارف عن المذاكرة ..عامه انا مش بكتب شعر ولا زجل بالعامية بس حاولت اعبر عن معاااااانااااااااه التعليم فى مصر :



وانا برضو كمان محتاسه زيـــــك

اختارت تاريخ وانا مبســــــــــوطه

قالولى ده قشور ..ده كلام قوطة

احسنلك تدخلى فطـــــــــــفولة

قلتلهم لأ ده مفيش زيــــــــــــه

مفيد ولذيذ وانا مبسوطـــــــــة

وبعنّـــــــــدى دخلتـــــــــــــــــة

طلع كوســــــــــــــــــــــــــــــه

ده كتاب ودى ملزمه منحوســـة


وعملنا ابحاث وطلع عيــــــــــنا


فى مكاتب وكتب مهروســـــــة


ولغوا صفحات ملهاش عــــــوزة


قالولنا بلاها كفايه حوســــــــــــه


خدوا الملزمه وعليها بوســـــــــه


ذاكروها كويس..صمــــــــــــوها


ومبروك نجاحكم بالكوســـــــــــــة
___________
معانى الكلمات :D
فطفولة : كلية رياض الاطفال

بدون تعليق..

سلام عليكم ورحمه الله وبركاته
واحده بتكلمنى وبتحكيلى
.
.
:انهارده أكلت اكله فاجررررره
.
اول ما سمعت الكلمه قولت اكيد فى حاجه غلط سمعته
ا
سألتها :كلتى اكله ايه ؟؟
.
.
فاجرة
.
.
قولتلها يعنى ايه ؟؟جامده يعنى؟
.
.
قالتلى ايووووة
.
.
يا نهار ابيض
انا كنت معتزله الدنيا ولا ايه
ده طلع امتى المصطلح ده!!
على ايامى كنا نقول اكله جامده..فظيعه..
لكن فاجره!!!!!
قولت خير
يمكن حاله وهتعدى
.
.
فوجئت قريبى بيتكلم عن اخته قالت حاجه تضحك
.
.
البنت دى كافره
هاهاهاها
.
.
اتصدممممممت
كافره
.
مقدرتش اسكت
قولتله يعنى خلاص مفيش كلمه توصفها بيها غير دى
.
.
قالى ليه مالها
.
.
قولتله ابدا اصل
من رمى رجلاً بالكفر، أو قال‏:‏ ياعدو الله وليس كذلك، إلا رجع عليه‏"
‏‏‏.
!!!
.
.
قالى بس انا مش نيتى كده
.
.
« إنَّ العبدَ ليتكلمُ بالكلمة من رِضوانِ اللهِ لا يُلقي لها بالاً يرفَعُه اللهُ بها درجات، وإن العبدَ ليتكلمَ بالكلمة من سَخَط اللّه لا يُلقي لها بالاً يهوي بها في جهنم » .
انت بتتكلم ازاى؟؟
******
.
ايه اللى جرى!!
ليه وصل بينا الحال لكده
كافره وفاجره
هنوصل لإيه تانى؟؟؟

تاج



سلام عليكم ورحمه الله وبركاته


جالى تاج من جنه صاحبه مدونه ما علينا


بسم الله الرحمن



أنت مين؟


انا اللى بعتى لها التاج

:D


مين اكتر 6 أشخاص بتحبهم ؟
:) طبعا مفيش اختلاف عن الرسول صلى الله عليه وسلم

والدى ووالدتى وصحباتى فى الثانوى عددهم 4

وناااس كتيييييييير بس انتي مش مديانى غير 6 بس:@



هل انت سعيد؟


لأ, انا امنية

:P

الحمدلله سعيده وربنا يديمها يارب ويسعد ايامك يا جنتى


هتعمل ايه لو اجتمعت مع مبارك فى مكان واحد؟


هودى وشى الناحيه التانيه:D

اصل فى ايه يتقال..!

ما خلاص


لو معايا مليون ونص جنيه اعمل ايه؟


هشترى شقه لجمعيه الروان الخيريه فى القاهره وهودى نص مليون جنيه لمنطقه بطن البقر يستغلوها لتحسين حياتهم شويه

والمليون وربع الباقيين هاخد ربع ليا اسافر بيه واعمل مشروع حضانه اطفال والمليون الباقى هديهم لوالدى واترك له حريه التصرف فيهم:)


بتحب مصر؟


حقيقى مش عارفه ان كنت بحبها ولا لأ
السلبيات اللى فيها اكتر من الايجابيات
ربنا يصلح حالها بقى


انت مسلم ؟؟


ولله الحمد


ليه؟؟


مسلمه لأنى اتولدت لقيتنى مسلمه والحمدلله ويارب اقدر اعمل حاجه للإسلام وربنا يتقبلها منى
.


مين اكتر شخصية متقدرش تستغنى عنها؟


ماما وبابا
ممكن اقول " باما " ؟ :D

ايه اكتر موقف محرج ؟؟

كتييييييير
اخر موقف كنت داخله النادى مع صاحبتى وطلعت الكارنيه وريته لبتاع الامن قالى ايه ده ؟ ( في سرى ده بيستظرف ولا ايه ) المهم بثقه قربت الكارنيه منه وقولتله الكارنيه ..قالى ايه ده ( بيتسظرف برضو في سرى ) ولقيت صاحبتى بتضحك وبتقولى ده كارنيه الجامعه يا امنية
:D

اصلى كنت بتكلم بثقه اوى



الامنية اللى تتمنى تحقيقها؟


ان ربنا يجمعنى بكل من يعزّ عليا في الفردوس الاعلى





التاج باه يتمرر لمين ؟؟؟؟

لجاست اسماء صاحبته مدونه
مملكتى



مش بفلوسنا يا سويرس




هانغير المحطه.....والشبكه كمان

سلام عليكم ورحمه الله وبركاته






مش بفلوسنا يا سويرس

حمله يقوم بها موقع قاطع ضد نجيب سويرس صاحب شركه موبينيل

ايه السبب؟



السبب هو القناه الجديده للى عملها سويرس

Otv
القناه بتعرض افلام بدون تشفيرولا حذف للمشاهد المخالفه للاسلام والادب

المشكله الاكبر انها قناه بدون اشتراكات

يعنى ممكن اى حد بيحول فى المحطات يشوفها

كنت بقلب مرة واستوقفنى برنامج عن الطبخ

وجه فاصل اعلانى

انا اتصدمت من الاعلان عن القناه اصلا!!

من ساعتها مش بجيبها

بلا طبخ بلا بتاع




المشكله كمان ان اكيد مكاسب شركه موبينيل بتستخدم فى الصرف على القناه دى

يعنى بفلوسنا بنعرض افلام ومشاهد غير لائقه لاولادنا وشباب مصر والعالم العربى

استغفر الله



من يومين جبت خط فودافون بدلا من موبينيل

( واحب انتهزها فرصه واقول للبنات ابقوا اسألوا عليه علشان مش عارفه اقولكم ازاى كلكم انا لسه شغاله بالقديم لغايه ما اعرفكم:D )





عايزين ايجابيه يا جماعه

وبقى عندنا اختيارين لو مش عاجب فودافون فى اتصالات





وهتلاقوا لينك موقع قاطع على المدونه موجود ان شاء الله