نويت أكوم مستقبلي

السلام عليكم ورحمه الله وبركاته

عارفه ان لسه منزله التاج انهارده بس مش قادره استنى بصراحه لانى صبرت كتير على الموضوع ده

الحمد لله انا كنت من ضيوف الرحمن هذا العام

ولكن المؤسف انى كنت من حجاج بعثه وزاره الداخلية لحجاج القرعة

لا انكر انى استفدت كتير من هذه البعثه

اتعلمت الصبر

اتعلمت كظم الغيظ

اتعلمت ان مصر لا تفارقنا اينما ذهبنا

اتعلمت ان المصريين بيعاملوا اسوأ معاملة سواء جوه او بره

بدون مبالغه ولا حاجه

اتعلمت ان مشقه الحج مش فى المناسك.. مشقه تصنع بيد البشر

انا رجعت من السفر بقالى اسبوعين تقريبا ومازلت احمل غضبا من البعثه حتى الآن

الموضوع هدفه الأساسى والوحيد إظهار حقيقة بعثة وزاره الداخلية لحجاج القرعه
__

هحاول اختصر بقدر الإمكان ولكن ليس على حساب توضيح الامور

فلنبدأ من البداية

لا انكر ان تجهيزات السفر كانت يسيره والحمد لله وحجز الطيران وكل ما نحتاج للذهاب

ولكن حين وصلنا مطار جدة

كانت البشرى بحال البعثه .. ركبنا الاتوبيسات تمهيدا للذهاب لجدة

ولكن طال انتظارنا .. ساعه .. ساعتان..لدرجه انى نمت من تعب الرحلة ولا اعلم متى تحركت الاتوبيسات

وارد جدا فى اى بلد فى بلاد الدنيا ان يتأخر.. لم اكترث كثيرا للتأخير

وصلنا للفندق فى مكة وبدأت عملية التسكين

حاله من الفوضى وعدم التنظيم سادت الموقف

انا فعلا مستغربه ان فى حد مسئول عن حوالى 1000 بنى ادم وبيستخدم الورقه والقلم والكوريكتور !!
بالرغم من وجود جهاز كمبيوتر.. الا انه غالبا ديكور

الحمد لله تم التسكين وبدأت رحله الروح الى المسجد الحرام

حتى حان وقت الذهاب الى عرفه

ويالها من مهززززززلة

معروف ان معظم الحجاج من كبار السن فلا يليق ابدااااا ان يكون الركوب ب( اللى يلحق )!!

الاتوبيسات غير كافية والكل يتزاحم والكل لا يهتم الا بأن يركب بكل تأكيد

والادهى انه مفتحوش الاماكن المخصصة لوضع الحقائب فى الاتوبيس

يعنى كل واحد يحط حاجته على رجله!!

ومعروف ايضا ان كل واحد معاه بطانيته والاكل غير الادوية بالنسبه لكبار السن

لكن لا انسانية ..كل واحد يحط على رجله وخلاص!!

بعد وصولنا عرفه سعدت جدا بما رأيت صراحه

كل مخيم مرفوع عليه بالون كبيره عليها العلم لتدل اصحاب الدوله على مخيماتهم نظرا لتشابه الاماكن

وطبعا مصر المحروسة معندهاش بلالين فكانت توهه ما بعدها توهه لحد ما لقينا المخيم

خيمه غير مؤهلة لحياة آدامية

حيث اننا ذهبنا لعرفه فى اليوم السابق له وكان علينا البيات طبعا فى الخيمه

وبإفتراض انى انا - كشابه - هقدر انام على سجاده ..
كبار السن اصلا بيقعدوا على الارض بأعجوبة نظرا لحالتهم الصحية!!

دورات المياه واماكن الوضوء لا تليق ابدا ابدا باى كائن حى ايا كان

الابواب معظمها بايظه والمياه لا تصل لكافه الاماكن

اماكن الوضوء مسدوده والحنفيات اشتغلت اول مره وبعدين خلاص!!

ناهيكم عن الوجبات العظيمه اللى اتوزعت علينا

وجبه لا تسمن ولا تغنى عن جوع

علبه تونه - عصير برتقال - بسكوت مملح - كرواسونايه حالتها تصعب على الكافر ,.حتى الآن لا اعلم ما طعمها
وتفاحه وكنت سعيدا بتواجدها جدا جدا

طبعا هى الوجبه كويسه

لكن اما يكون كل يوم لمده 4 ايام هى نفس الوجبه والمفروض تسندنا على مشقه الحج

يبقى حرام عليهم !!

__

حتى الآن الوضع كان الى حد ما كويس وده اللى اكتشفته لما انتقلنا للمرحلة التانية

الخروج من عرفه

نتفترض اننا 1500 مصرى فى المجموعه اللى كنا فيها

عدد الاتوبيسات كان قليل جدا جدا جدا بالنسبة للناس

ومفيش حد اصلا يقولنا فين الاتوبيسات ولا اى حاجه

لدرجه ان فى ناس مشيت من عرفه للمزدلفه شايلين حاجاتهم

لان معرفوش يزاحموا فى الركوب

الحمد لله ربنا قدر لنا الركوب

ووالدى ركب فوق الاتوبيس على امل ان الطريق قصير

ولكننا وصلنا المزدلفه بعد حوالى 8 ساعات!!

فى حين ان المسافه اصلا حوالى تلت ساعه

لكن لظروف الزحام وظروف ان مكانش فى سواق!!

فعلا مكانش فى سواق..وده اللى اكتشفناه

سائق الاتوبيس حاج معانا وطبعا مش عارف الطريق وتوهنا

امرأه مسنه كانت جنبى فى الاتوبيس مريضه بالسكر

كانت جايبه الانسولين معاها وحاطاها وسط تلج وطبعا التلج ساح والانسولين باظ!!

طبعا غير كبار السن اللى قاعدين فوق الاتوبيس!
( كنت اما بشوفهم فى العيد وانا فى مصر كنت بفتكرهم قاعدين من الفرحه!!)
وصلنا للمزدلفه وجمعنا الجمرات.. وتحركنا مباشره لمنى ولم نبيت كما هو وارد فى السنة

ووصلنا منى وبدأت متاهه جديدة

وكده اصبح الطريق من عرفه لمنى 18 ساعه

طبعا الرجال فوق الأتوبيس كادوا ان يصابوا بضربه شمس

ووصلنا لمنى واذا بالسائق يتوقف بالاتوبيس على كوبرى فى منى ويطلب منا النزول لانه مش عارف مكان المخيم!!

نزلنا بالشنط والبطاطين صغار وكبار ومش عارفين نروح فين!

واصعب ما فى الامر اننا فى الطريق كنا بنشوف كبار السن شايلين الشنط وظاهر عليهم علامات الارهاق من الشمس ومش قادرين نشيل عنهم..لاننا زيهم!!

وقفت انا وامى والنساء وذهب ابى مع الرجال علشان يسألوا عن المكان لاننا فعلا كنا ارهقنا من الشمس واصلا ماشيين ومش عارفين الطريق ..!

عسكرى سعودى جزاه الله خير وصف لنا المكان

وصلنا مجهدين جدا طبعا بعد سير ساعه تقريبا فى الشمس

والمفاجأه

لا مكان لنا فى الخيام!!

...

يتبع ان شاء الله

والمهازل الأكبر..